وثائق التسجيل في باك حر

نظرا لبزاف ديال التساؤلات حول هدا الموضوع .

اول حاجة غاديرها الا بغيتي تسجل فباك حر هو انك تسجل فالسيت الخاص بباك حر 2023 وهاد السيت هاهو قدامك ( السيت مزال مامفتوحش تال نهار الثلاثاء 1 نونبر غير حطيتو باش كولشي يعرفو ) ،

السيت هو كالتالي :

من بعد ماتجل فالسيت كاتخرج فيها وصل التسجيل وواحد للالتزام ديال الغش وداك الالتزام كاتكاليزيه فالمقاطعة .

من بعد كاتمشي المكتبة كاتشري الملف الابيض هو معروف خاص بالباكالوريا احرار كايدير جوج دراهم ( هاهو فالصورة قدامك )

من بعد كتاخد الصفحة الاولى ديال الملف فيه واحد البلاصة سميتها

$طلب_الترشيح داك الطلب كاتعمرو نتا بالمعلرمات الشخصية ديالك ، من بعد كاتقلب الصفحة ديال الملف كاتلقا

$شهادة_الانقطاع ، ديك شهادة الانقطاع كاتديها لاخر اعدادية او اخر ثانوية قريتي فيها تما كايعمرها لك المدير ديال المؤسسة وكاتعطيه واحد الصورة ديالك يلصقها فالملف ويكاشي عليها ، والناس لي خداو تاسعة حرة هما كايخليو ديك شهادة الانقطاع خاوية تال النيابة كايعمروها تما من بعد كاتلقى فالملف واحد البلاصة سميتها

$موجز_من_رسم_الولادة او عقد الازدياد ، هاديك كاتعمرها فالمقاطعة لي مسجل فيها اي المقاطغة لي كاتصايب فيها عقود الازدياد

وكاينة واحد الخانة فالملف سميتها شهادة مدرسية هاديك مكاتعمرها ماوالو كاتخليها خاوية ، صافي هانتا عمرتي الملف ديالك وتهنيتي فيه .

من بعد ماكاتعمر الملف وتهنا فيه خاصك تجمع شي وثائق ، هاد الوثائق هما :

* نسختين من وصل التسجيل ( هادوك لي خرجتي من السيت ملي تسجلتي )

* التزام بالغش مصادق عليه ( داك الالتزام تاهو خرجتيه فالسيت وكاليزيتيه فالمقاطعة )

* صورة شخصية او صورتين ( كاينين نيابات كايطلبو صورك وحدة كاينين كايطلبو جوج ، نتا دي معاك جوج تصاور وتهنا )

* نسخة من البطاقة الوطنية

* أظرفة متنبرة ( هاد الاظرفة كاينين نيابات كايطلبوهم وكاينين نيابات مكايطلبوهومش ، نتا شوف الاعلان ديال النيابة ديالك الا طلبوهم ديهم معاك كاتكتب فيهم الاسم ديالك والعنوان ديالك )

* شهادة السكنى ( هاد شهادة السكنى ماشي كولشي كايديرها ، كايديروها فقط الناس لي بغاو يدوزو فمدينة اخرى من غير مدينتهم الاصلية ، كايديرو شهادة سكنى كاتبين انهم ساكنين فديك المدينة باش النيابة تقبل ليهم الملف ديالهم )

* شهادة الاعفاء من التربية البدنية ( كايديروها غير الناس لي مابغاوش يدوزو السبور ) امتحان الرياضة كيكون في مارس شهر 3 .

صافي غاتجمع هاد الوثائق كاملة وديرهم وسط الملف وكاتديه للنيابة ديالك وكادفعو ، ملي كادفعو فالنيابة كايعطيوك واحد الوصل هداك الوصل حتافظ به .

بالتوفيق للجميع .