كيفية إعداد السيرة الذاتية السيفي
هااااا كيفاش تصيب CV زوين و يكون متميز و يخلي ديك الشركة للي غتشوفو تحبو و تقتانع بيك، المهم هادو مجموعة ديال النصائح للي خاصكم تبعوها باش طلعوا CV متميز :
قبل منبداو خاصكم تعرفوا بللي السيفي خاصو يكون مقسم ل 7 ديال الفقرات و للي هي :
--------------------------------------------------------------------------------
1) أول فقرة و للي هي التعريف الشخصي و للي خاص يكون فيها : الاسم الكامل و تبدى بالاسم العائلي عاد الاسم الشخصي و تحتو تاريخ ومكان الازدياد، العنوان البريدي، الهاتف، العنوان الإلكتروني، الحالة الاجتماعية ( عازب، متزوج ، عنداكك تكتبو ليهم مصاحب(ة) ههه... ) و البيرمي إلى كان عندك و تحدد أشمن نوع، و فالجنب ديال هاد المعلومات كتحط الصورة الشخصية ديالك وللي خاص تكون صورة بروفيسيونيل بحال ديال لاكارط تقريبا ماشي دوك التصاور ديال البوزات بحال الى مصيفطها لصاحبك وﻻ صاحبتك ههههههههههه.
-----------------------------------------------------------------------------------
2) ثاني فقرة و خاصة ب لي Formations ديالك و كتبدا من آخر فورماسيون و نتا هابط تتوصل لأول وحدة يعني مثلا ( كتدير الديبلوم للي خديتي ف 2015 إجازة و من تحتو كدير 2014 تقني متخصص و من تحتو 2012: باكالوريا و كتحدد المجال للي خديتي فيه كل ديبلوم و سميت المؤسسة للي خديتيه منها.
------------------------------------------------------------------------------------
3) الفقرة الثالثة و للي هي التجارب المهنية، لي Expériences Professionnelles و نفس الشيء كتبدا من آخر وحدة دوزتي و نتا هابط، و للي كتحدد فكل تجربة : التاريخ أو المدة ديالها و سمية الشركة و المهمة ديالك فيها آنذاك.
للإشارة Stage مكيتعتبرش ايكسبريونس بروفيسيونيل
------------------------------------------------------------------------------------
4) الفقرة الرابعة و للي هي معارفك مثلا في مجال المعلوميات بحكم أن معظم الشركات كيبغيوك تكون كتفهم فهاد المجال واخا تعرف غي تشعل و طفي البيسي، و هنا كتحدد شنو كتعرف فيه مثلا : Bureautique لوورد و إكسيل ..., ...
------------------------------------------------------------------------------------
5) الفقرة الخامسة و للي هي أشياء أخرى Autres مثلا إلى كنتي كتنتمي لشي جمعية كتبها ولا كنتي كدير التجارة الحرة كتبها يعني أي حاجة مفيدة كتعمر بيها وقتك خاصك تحددها ليهم.
------------------------------------------------------------------------------------
6) الفقرة السادسة و هي اللغات للي كتكلم بهم و قدام كل لغة كتحدد المستوى ديالك فيها واش كتهضر بيها و كتقرى بيها و كتكلم بيها ولا شنو بالضبط و إن كان كاين للي كيقول بللي لا داعي تحدد المستوى ديالك فاللغات للي غتكتبهم.
------------------------------------------------------------------------------------
7) الفقرة السابعة و الأخيرة و للي هي المواهب ديالك أو الهوايات و هنا خاصك تكتب داكشي للي عندك مثلا ماشي نتا عمرك قريتي شي كتاب و تكتب ليهم هوايتك القراءة ههه ولا نتا عمرك شديتي عصا ديال الكولف فيدك و تكتب ليهم هوايتي لعب الكولف ههههه
------------------------------------------------------------------------------------
و أهم حاجة من هادشي كامل هو متزيدش شي حاجة للي مكتعرفش ليها و متكدبش، دير داكشي للي عندك و للي كتعرف ليه، هذا من جهة و من جهة آخرى خاصك تختار تناسق الألوان فالسيفي مديرش ليهم قوس قزح و عموما الألوان للي نقدر نصحك بيهم هوما اللون #الأزرق ولكن زرق بارد تقريبا بحال ديال الفيسبوك و تزوق بيه غي العناوين ماشي دير بيه شخبط لخابيط مسيك اﻷلوان ...
نتمنى نكون قدرت نوصل ليكم المعلومة كما ينبغي و الله يوفق الجميع.
و حاجة آخرة السيفي ديالك خاص يكون عندو عنوان الفوق مثلا :
Technicien spécialisé en ... أو Ingénieur ... أو Licence en ........
